Türkiyənin "Zaman” qəzetinin dünənki sayında Ermənistanın silahlı qüvvələrini gücləndirməsindən bəhs edən yazı dərc edilib. Qəzetin köşə yazarlarından Fikrət Ertan iddia edir ki, əhalisinin sayının az olmasına baxmayaraq Ermənistan ordusu Cənubi Qafqazda "ən güclüdür”.

Bu tərifə görə Ermənistan KİV-ləri də F.Ertanın yazısına həvəslə yer veriblər. Müəllif Ermənistan ordusunun regionda "ən güclü” olduğunu qeyd etməklə bərabər əlavə edir ki, bu qiymətləndirmənin nə dərəcədə həqiqəti əks etdirdiyini demək çətindir.
"Ancaq Ermənistanın keçmişdə Azərbaycan qarşısında üstün gəldiyi və Rusiyanın da yardımı ilə ərazilərinin 20 faizini işğal edə bildiyi, bu durumu indiyədək mühafizə etməsi aşkar həqiqət olaraq ortadadır. Buna baxmayaraq, Ermənistan mövcud hərbi üstünlüyünü yetərli hesab etmir, ordusunu daha da gücləndirmək üçün həmlələr edir. Ötən həftə Ermənistanda Milli Təhlükəsizlik Şurasının iclasında prezident Serj Sərkisyan tərəfindən 2011-2015-ci illər üçün silahlanma planının təsdiqlənməsi də bunu göstərir” - deyə F.Ertan bildirir.
F.Ertan qeyd edir ki, məlumatlara görə, silahlanma proqramına uzaqvuran yeni silahların alınması da daxildir. O, Ermənistanın silahlanma proqramının Qarabağ münaqişəsi ilə bağlı olduğunu qeyd edir. Bildirir ki, hazırda Ermənistanın əlində uzaqvuran "Skad” raketləri var: "Bəlkə başqa silahlar da var, kim bilir? Rusiyanın Ermənistana modern silahlar verdiyi məlum həqiqətdir. Bu çərçivədə Rusiya uzaqvuran raketləri də Ermənistana vermiş ola bilər. Ermənistanın düşmənləri bu vəziyyəti nəzərə almalıdır. Lakin ”Erməni açılımı, Qafqazda sülh" kimi sadəlövh təşəbbüslər irəli sürən Ankara da Ermənistanın uzaqvuran silahlar əldə etmək istəyinə diqqət yetirməlidir".